Náðunarnefnd fjallar um Aron Pálma

Mál Arons Pálma Ágústsonar hefur verið tekið til meðferðar hjá náðunarnefnd Texas í Bandaríkjunum. Þetta segir Einar S. Einarsson, talsmaður RJF-hópsins, en hópurinn hefur barist fyrir frelsi Arons Pálma úr stofufangelsi í Beaumont í Texas. Náðunarnefndin mun væntanlega taka afstöðu í málinu innan sex mánuða en það er svo ríkisstjórans að taka endanlega afstöðu til náðunarinnar. "Ég hef upplýsingar um það að náðunarnefnd Texas hafi fengið málið til umfjöllunar. Það gerist í raun í kjölfar þess að Aron Pálmi ákvað að hann vildi ljúka afplánuninni á Íslandi en einnig út af þeim stuðningi sem hann hefur fengið frá Íslandi og meðal annars frá RJF-hópnum. Þá er það svo að nefndin hefur um sex mánuði til að afgreiða málið en það getur tekið lengri tíma þar sem röðin er löng en við vonum það besta," segir Einar. Einar segir að ef nauðsynlegt þyki muni sendinefnd á vegum stuðningshóps Arons Pálma halda til Texas til að þrýsta á afgreiðslu málsins. "Ef það er ekki hægt að nálgast yfirvöld í Texas með því að hringja eða skrifa þá verðum við að banka upp á. Það er nauðsynlegt að hamra járnið meðan það er heitt. En við vitum að skrifstofu ríkisstjórans hefur borist bréf hópsins og það hefur verið staðfest af póstflutningarfyrirtæki. Nú er að bíða og sjá. Við ætlum að fylgja þessu máli eftir," segir Einar. Einar ræddi við Aron Pálma í vikunni og sagði að hljóðið í honum væri dauft og Aron Pálmi vonaðist eftir niðurstöðu sem fyrst. Hann ætti þó von á heimsókn frá foreldrum sínum og hlakkaði til að hitta þau. Ræðismaður Íslands í Houston í Texas hefur verið beðinn um að fylgja málinu eftir ytra og fara eða hringja til skrifstofu ríkisstjórans í Texas. Beðið er eftir því hvort sú vinna muni skila árangri. Skrifstofa ríkisstjóra Texas kannaðist ekki við að hafa móttekið bréf RJF-hópsins þegar Fréttablaðið hafði samband þangað í gær.