Lækningalind opnuð í Bláa lóninu

Lækningalind Bláa lónsins var formlega opnuð síðdegis. Aðstaðan á að stórbæta þjónustu við psoriasis-sjúklinga hér á landi. Lækningalindin er samvinnuverkefni íslenskra stjórnvalda og Bláa lónsins og er tímamótaverkefni i heilsutengdri ferðaþjónustu á Íslandi. Jón Kristjánsson heilbrigðisráðherra og Eðvarð Júlíusson, stjórnarformaður Bláa lónsins, losuðu hraunhellu í byrjun árs í fyrra og nú afhjúpuðu þeir sömu hellu við vígsluna í dag. Blue Lagoon meðferð við psoriasis er einstök á heimsvísu, mjög árangursrík og án aukaverkana. Meðferðin er nú þekkt á alþjóðavettvangi og hafa meðferðargestir frá 19 þjóðlöndum heimsótt Bláa Lónið lækningalind á undanförnum árum eingöngu til meðferðar við psoriasis. Lækningalindin er eina húðlækningastöðin í heiminum sem einbeitir sér eingöngu að rannsóknum og meðferð á psoriasis. A ðstaðan er óneitanlega glæsileg en hvað er svona sérstakt við lækningalindina? Jón Þrándur Steinsson, yfirlæknir Lækningalindarinnar, segir að það sé eitthvað í vatninu sem gerir það að verkum að húðsjúkdómar grói oft mjög vel. Í vatninu sé sérstök gerð af bakteríum sem finnist ekki annars staðar og þá sé þar einnig að finna sérstaka gerð af þörungum. Svo sé það hugsanlega kísillinn eða hitinn í vatninu, en þetta hafi allt virkað mjög vel í gegnum árin.