Össur lét klappa fyrir Ingibjörgu

Ekkert varð af sameiginlegum fundi Ingibjargar Sólrúnar Gísladóttur og Össurar Skarphéðinssonar á Akureyri í gær eins og auglýst hafði verið. Í tilkynningu frá Ingibjörgu, sem lesin var upp á fundinum, sagðist hún vera veðurteppt í Reykjavík en ekki var flogið á milli Akureyrar og Reykjavíkur í gær. Össur og Kristján Möller, fyrsti þingmaður Samfylkingarinnar í Norðausturkjördæmi, komust hins vegar á fundinn með því að fljúga frá Reykjavík til Sauðárkróks í gær og aka þaðan til Akureyrar. Ekki var gefin skýring á því á fundinum afhverju Ingibjörg Sólrún notaði ekki sömu aðferð til að komast norður. Össur kom lítið inn á væntanlegan formannsslag í Samfylkingunni en bað fundargesti að klappa fyrir Ingibjörgu Sólrúnu. "Við höfum verið vinir í bráðum 30 ár. Við eigum sömu tengdaforeldra og hefur vinátta okkar verið góð og einlæg. Við verðum áfram vinir ef ég fæ einhverju um það ráðið," sagði Össur.