Veitt var í þrjá daga

Dragnótaveiðum Sólborgar á veiðsvæðinu milli Hríseyjarvita og Hjalteyrar í Eyjafirði er lokið, þrátt fyrir að enn sé einn og hálfur mánuður þar til leyfi sjávarútvegráðuneytis til fyrirtækisins rennur út. Þetta kom fram á fundi sjávarútvegsnefndar í gærmorgun, þar sem fulltrúar Kletts, félags smábátaeigenda á Norðurlandi eystra, fulltrúi landssambands smábátaeigenda og fulltrúar sjávarútvegsráðuneytisins funduðu með nefndarmönnum. Þetta er þriðja árið sem Brim hf. hefur fengið leyfi til veiða á þorski til áframeldis á svæðinu. Á þessu ári hafa um 15 tonn verið veidd í Eyjafirði öllum og þar af hafa um 13 tonn náðst lifandi. Að sögn Óttars Más Ingvasonar, framkvæmdastjóra Brim fiskeldis var að þessu sinni veitt í þrjá daga innan leyfissvæðissins, en leyfið náði til 52 daga. Pétur Sigurðsson, formaður Kletts, segir að því sé fagnað að veiðunum skuli vera hætt og að nú sé einungis veitt utan Hríseyjarvita. Á fundinum í gærmorgun hafi verið farið yfir leyfisveitinguna, sem smábátaeigendur í Eyjafirði hafa mótmælt. "Við erum ánægðir með þau svör sem við fengum og við voru fullvissaðir um að svona ákvörðun yrði ekki tekin aftur. Að minnsta kosti myndi hún fara í allt annan farveg."