Gæslan æfir með dönsku varðskipi

Áhöfn danska varðskipsins Triton hélt sameiginlega æfingu með flugdeild Landhelgisgæslunnar á dögunum. Báðar þyrlur Landhelgisgæslunnar tóku þátt í æfingunni. Áhöfn TF-LIF æfði eldsneytistöku frá varðskipinu en það er nokkuð vandasöm aðgerð sem þarfnast mikillar nákvæmni. Það getur gert gæfumuninn ef slys á sér stað í mikilli fjarlægð frá landi að þyrlan geti tekið eldsneyti frá skipi. Ekki er aðstaða til þess í varðskipunum Ægi og Tý. Áhöfn TF-SIF æfði aðflug og lendingu á þyrlupalli Tritons. Lending tókst vel þrátt fyrir talsverðan velting á skipinu. Forstjóri ásamt þremur starfsmönnum Landhelgisgæslunnar var í boði skipherra Triton um borð í skipinu og sá áhöfn TF-SIF um að flytja þá til Reykjavíkur að æfingu lokinni.  Um borð í skipinu fengu Landhelgisgæslumenn fræðslu um hlutverk varðskipsins og verkefni.  Í tilkynningu frá Landhelgisgæslunni segir að eins og endranær séu Tritonsmenn reiðubúnir til samvinnu við Gæsluna á sem flestum sviðum. Sérstakur samningur er einnig til staðar um samstarf Landhelgisgæslunnar og danska sjóhersins á sviði leitar- og björgunarmála. Á annarri myndinni eru báðar þyrlur Landhelgisgæslunnar á flugi yfir skipinu en það er nokkuð sérstakt að þær náist báðar á flugi í einu á mynd. Hin myndin sýnir TF-LIF í hangflugi yfir Triton á meðan verið var að dæla í hana eldsneyti frá varðskipinu.