Bóluefni gegn reykingum

Bóluefni gegn reykingum hefur gefið betri raun en lyfleysa í frumrannsóknum breska líftæknifyrirtækisins Xenoxa Group. Næsta stig rannsókna á bóluefninu hefst á þessu ári. Í yfirlýsingu frá fyrirtækinu segir að þeim sem hafi verið gefið bóluefnið hætti frekar að reykja en þeir sem hafi fengið lyfleysu. Aðeins fyrsta hluta rannsóknarinnar er lokið en lyf þurfa að komast í gegnum þrjá hluta til að verða viðurkennd. Valgerður Rúnarsdóttir, læknir hjá SÁÁ, segir slíkt lyf geta verið góða viðbót við þau hjálpartæki sem þegar eru til, til að hjápa fólki að losna undan reykingafíkn. Hún segir hugsunina vera þá að líkaminn myndi mótefni þannig að þegar nikótínið komi í blóðið lendir það í mótefninu, áður en það kemst til heilans. Fólk finni því engin áhrif af reykingunum sem getur bæði hjálpað fólki að hætta að reykja og komið í veg fyrir að fólk hafi nokkurn tíma nokkra ánægju af því að reykja.