Hópnauðgun á Tjörninni

Stokkandarsteggir ráðast mjög harkalega að kollum á Tjörninni í Reykjavík. Sjónarvottar standa á öndinni og líkja þessu við hópnauðgun sem óhugnanlegt sé að horfa upp á. Voðaverkin geta átt sér stað annars staðar en í veröld mannanna og eflaust kemur það einhverjum á óvart að halda þurfi fyrir augu barna á tjarnarbakkanum. Starfsmenn Iðnó hafa alloft orðið vitni af árásum steggja á kollur. Ein árásin átti sér stað fyrir skömmu. Brynhildur Magnea Sigurðardóttir, sem starfar á Iðnó, líkir henni við hópnauðgun og segir átta steggi hafa ráðist á eina kollu sem legið hafi í hnipri undir bekk alblóðug. Þegar fólk hafi reynt að nálgast hópinn hafi bæði steggirnir og kollan farið út á tjörn. Brynhildur segir að erfitt hafi verið að gera eitthvað eftir að þau voru komin þangað en reynt hafi verið að stía steggjunum frá kollunni með priki og látum. Það hafi gengið frekar illa. Brynhildur segir flestum hafa orðið illa við að sjá árásina. Hún segir móður hafa gripið fyrir augun á stráknum sínum og leitt hann í burtu vegna þess hve óhugnanlegt þetta var. Þá hafa íbúar í Þingholtunum orðið vitni af því þegar kollurnar reyna að flýja með steggina á eftir sér að íbúðarhúsunum og hafa kollur fundist illa særðar í görðum þar. Dagmar Vala Hjörleifsdóttir, dýralæknir á Dýraspítalanum, segir þessa hegðun hjá öndunum óeðlilega því þessar endur pari sig yfirleitt fyrir lífstíð. Hún telur að þarna sé um að ræða baráttu steggjanna um ungu kollurnar sem hafa ekki enn parað sig. Hún segist halda að svona nokkuð sjáist ekki úti í náttúrunni og telur hún hugsanlegt að of mikill þéttleiki andanna á tjörninni riðli mynstri þeirra og að þessi hegðun sé afleiðing af því.