Fundu tundurdufl

Tundurdufl fannst yst í norðanverðum Reyðarfirði um hádegisbil í gær. Það var skipið Sólborg ÞH 270 sem fann tundurduflið við svokallaðan Lagga og tilkynnti lögreglunni á Eskifirði strax um málið. Tundurduflið var gert óvirkt þegar Sólborg ÞH 270 kom með það í land og lögreglan brenndi það um sjö-leytið í gærkvöldi. Fágætt er að slíkt finnist í kringum landið en sprengihleðslur úr breskum tundurduflum hafa fundist á suðaustur landi í svokölluðum Rósagarði sem hlaut nafn sitt vegna hins mikla fjölda tundurdufla sem þar var lagt á stríðsárum.