Veggjatítlur í miðborginni

Veggjatítlur finnast æ oftar í gömlum húsum í miðborginni. Kaupandi íbúðar í Þingholtunum, þar sem veggjatítlur fundust, fer fram á riftun kaupsamnings. Lirfur veggjatítlunnar bókstaflega éta í sig timburhús. Kaupandi íbúðar við Óðinsgötu varð var við kvikindin skömmu eftir kaupin upp úr miðjum maí. Guðmundur Halldórsson skordýrafræðingur skoðaði aðstæður þar í dag. Hann segir götin sem lirfur títlunnar skilji eftir minna á fín naglaför. Lirfan lifi á viði og éti sig í gegnum hann, en hún geti verið mörg ár í viðnum. Í gömlum húsum þar sem rakaskemmdir eru líður veggjatítlum best. Það getur hins vegar reynst mjög erfitt fyrir húseigendur að útrýma þeim. Guðmundur segir að ef menn kaupi hús sem er fúið losi þeir sig við spýtur sem eru rakar og komi í veg fyrir að bleyta komist inn en þetta sé erfiðara þegar veggjatítlan sé annars vegar.   Veggjatítlur geta flogið og segir Guðmundur að ekki sé hægt að útiloka að kvikindin geti borist í nágrannahús enda veit fréttastofa Stöðvar 2 að veggjatítlur valda usla víðar í miðborginni. Eigandi íbúðarinnar vill rifta kaupunum og aðrir eru að kanna réttarstöðu sína. Guðmundur segir títluna að finna í mjög mörgum húsum en ekki sé hægt að benda á upptök hennar. Menn geti tekið hús og brennt það en þeir séu samt ekki lausir við smithættu. Í gamla bænum leynist eflaust veggjatítla víða. Tilvikunum hefur fjölgað síðustu misseri. Guðmundur segir að eldri hús séu nú mjög vinsæl. Ungt fólk kaupi þau og geri þau upp og gangi um leið úr skugga um að veggjatítlu sé ekki að finna þar.