Vongóð um að leysa deilu

Björg Thorarensen, nýr stjórnarformaður Landakotsskóla, er vongóð um að hægt verði að leysa deiluna sem staðið hefur um skólastarfið að undanförnu. Hún hefur þegar rætt við deilendur og mun eiga fund með stjórn skólans í vikunni. Uppstokkun í stjórn skólans varð þó ekki til að lægja öldurnar. Sjö kennarar sendu frá sér harðorða yfirlýsingu um óhugnanlega aðför að skólastjóra, aðstoðarskólastjóra, kennurum og nemendum. Þess er krafist að rógsbréf, sem á að hafa átt þátt í uppsögn aðstoðarskólastjóra, verði gert opinbert.