Bændur langeygir eftir rigningu

Þurrt er víða á landinu og er úrkoma síðasta mánuðinn langt undir meðaltali. Bændur á Norðurlandi og víðar eru orðir langeygir eftir rigningu. Mjög þurrt er orðið víða inn til landsins á Norðurlandi, Austurlandi, Vestfjörðum og við innanverðan Breiðafjörð. Á Akureyri hefur úrkoman mælst 5,4 millímetrar síðasta mánuðinn en meðalúrkoma þar er um 20 millímetrar. Enn minna hefur rignt á Nautabúi í Skagafirði en þar hefur úrkoman mælst 3,7 millímetrar síðasta mánuðinn. Eins hefur úrkoman aðeins mælst 3,6 millímetrar í Æðey í Ísafjarðardjúpi. Sú litla úrkoma sem hefur fallið hefur nýst illa þar sem hún kemur í litlum skúrum. Aðalsteinn Hallgrímsson, bóndi í Garði í Eyjafjarðarsveit, segir jarðir orðnar þurrar og segist aðspurður vera orðinn langeygur eftir rigningu. Grasspretta hafi verið mjög lítil vegna kulda en fyrst og fremst vegna þess að ekkert hafi rignt. Moldin sé einstaklega þurr og sjaldan hafi verið eins þurrt. Þótt sáð sé grænfóðri á grassvæði þá sé hann hræddur um að það spíri mjög seint og illa nema það komi mjög mikil rigning. Aðalsteinn segist þó bíða þolinmóður eftir rigningunni því bændur viti að það komi einhvern tíma rigning. Útlit er fyrir að rignt gæti á þriðjudag á Austurlandi samkvæmt upplýsingum frá Veðurstofunni. Það sama er ekki að segja um Norðurland en þar er búist við þurrki út vikuna en með norðanátt um næstu helgi gæti farið að rigna.