Nóg að gera fyrir norðan

Lögreglunni á Akureyri var fyrr í kvöld tilkynnt um árekstu tveggja bíla við þjónustumiðstöðina í Kjarnaskógi í Eyjafirði. Farþegi í öðrum bílnum fékk skrámur á höfuð. Ökumaður hins bílsins úlnliðsbrotnaði. Þá gerði rækjubáturinn Húsey frá Húsavík Tilkynningarskyldunni viðvart en hann fékk net í skrúfuna út af Mánáreyjum. Systurskipið Aldey hélt á vettvang til aðstoðar. Veður var slæmt þegar atvikið varð. Lögreglan á Húsavík fékk boð um að bíll hefði oltið á Melrakkasléttu fyrr í dag. Ökumaðurinn lemstraðist lítillega en kom sér af sjálfsdáðum á hótelið á Raufarhöfn og lét lögreglu vita. Bíllinn er ónýtur. Kveikt var í bílhræi í Reykjahlíðarþorpi við Mývatn síðdegis. Þar voru tveir pörupiltar á ferð en þeir voru að leika sér með eldspýtur. Slökkt var í hræinu með slökkvitæki.