Klórframleiðslan til Akureyrar

Fyrirtækið Mjöll Frigg jók klórframleiðsluna á Akureyri eftir að starfsleyfi fékkst ekki í Kópavogi. Fyrirtækið hefur starfsleyfi í iðnaðarhverfi á Sjafnarlóðinni skammt frá íbúðahverfi. Verði gasleka vart við bestu aðstæður þarf að rýma hús þar sem 200 manns búa. Slökkviliðsstjórinn á Akureyri, Erling Þór Júlínusson, segist hafa meiri áhyggjur af flutningi tólf tonna klórgasbirgða í gámum landleiðina milli höfuðborgarinnar og Akureyrar en af framleiðslu klórsins í verksmiðjunni. Í húsinu hafi verið efnavinnsla árum saman. Starfsleyfið verður endurskoðað síðar í mánuðinum. "Í verksmiðjunni er um það mikið magn klórgass að ræða að við verðum að meta aðstæður og skoða hvert líklegt lágmarkstjón gæti orðið af starfseminni og hvert hámarkstjón gæti orðið," segir Erling. Komi upp gasleki og vindur sé kyrrstæður þurfi að rýma 300 metra radíus en á því svæði séu um 200 íbúar. Við verstu aðstæður gæti þurft að rýma svæði inn að ráðhúsi bæjarins og suður fyrir Glerártorg. Erling segir slökkviliðið eiga von á búnaði til að bregðast við komi upp klórgasleki eða annar efnaleki á svæðinu. Á slíkum búnaði hafi verið þörf og tengist ekki komu verksmiðjunnar. Kristján Þór Júlíusson, bæjarstjóri Akureyrar, segir að standist fyrirtækið kröfur heilbrigðiseftirlitsins sem og lög og reglugerðir varðandi starfsemina hafi hann ekkert undan því að klaga. Erling tekur undir þau orð Kristjáns. Mikil umfjöllun varð um klórframleiðslu Mjallar Friggjar í Kópavogi vegna ótta íbúanna við umhverfisslys. Eigandi Mjallar Friggjar tjáir sig ekki um málið. .