Býður HR lóð í Urriðaholti

Oddfellow-reglan hefur boðið Háskólanum í Reykjavík allt að þrettán hektara lóð í Urriðaholti í Garðabæ undir nýja skólabyggingu. Háskólanum í Reykjavík standa til boða tvær lóðir undir nýja háskólabyggingu, í Urriðaholti í Garðabæ og í Vatnsmýrinni í Reykjavík. Fasteignasali sem fréttastofan ræddi við segir verðmæti um tuttugu hektara lóðar í Urriðarholtinu vera um einn og hálfur milljarður króna sé miðað við nýselt byggingarland í Garðabæ. Ásdís Halla Bragadóttir, bæjarstjóri Garðarbæjar, segir lóðina sem skólanum standi til boða ekki vera minna virði í krónum talið en lóðin í Vatnsmýrinni án þess að hún vilji nefna ákveðna krónutölu. Stöð 2 greindi frá því að lóðin í Vatnsmýrinni væri metin á minnst fimm milljarða. Styrktar- og líknarsjóður Oddfellowa býður háskólanum lóðina í Urriðaholti að kostnaðarlausu. Garðabær hefur einnig gefið það út að hvorki verði innheimt gatnagerðargjöld né fasteignagjöld. Gatnagerðargjöldin ein og sér gætu numið allt að 500 milljónum króna. Eins ætlar bæjarfélagið að tryggja skólanum alla grunnþjónustu á svæðinu, svo sem leikskóla, grunnskóla, íþróttahús og sundlaug. Ekki er staðar numið þar því bærinn ætlar líka að taka þátt í uppbyggingu á háskólatorgi. Á þriðja þúsund nemendur stundar nám við Háskólann í Reykjavík eftir að hann var sameinaður Tækniháskólanum en með því var ætlunin að skapa sterkan alþjóðlegan rannsóknarháskóla sem yrði í góðum tengslum við íslenskt atvinnulíf. Í skipulagi Urriðaholts er gert ráð fyrir að í kringum skólann geti bæði þrifist rannsóknarstofnanir og hugvitsfyrirtæki sé það vilji skólayfirvalda en einnig er möguleiki fyrir skólann að vera á afmörkuðu svæði. Ekkert er því til fyrirstöðu að hægt sé að hefja hönnun bygginga. Ef háskólinn ákveður að þiggja lóðina í Garðabæ ætti að vera hægt að byrja að kenna í nýjum skóla árið 2007.