Riðið yfir Hvítá

Sex borgfirskir hestamenn tóku sig til og riðu þvert yfir Hvítá, frá Hvanneyri að Einarsnesi á sunnudaginn var. Ekki er vitað til þess að þessi leið hafi verið riðin fyrr, enda bæði álar og sandbleytur að fara yfir á þessari þriggja kílómetra leið. "Þetta er örugglega í fyrsta skipti sem þetta er gert," segir Jón Ólafsson á Báreksstöðum, einn þeirra sem riðu yfir ána. "Þessi hugmynd kviknaði fyrir tveimur árum þegar verið var að draga rafstreng yfir ána. Ég fór þá yfir með beltavél sem notuð var við verkið og í kjölfarið datt mér í hug hvort þetta væri möguleiki." Síðan hófust athuganir á ánni úr lofti og með bát, þar sem reynt var að staðsetja álana og grennslast fyrir um dýpt þeirra. Og svo var lagt í hann. "Þetta var ekki alveg greið leið," segir Jón. "Við lentum í sandbleytu við ál nærri Einarsnesi og misstum tvo hesta niður. Þá hugleiddum við að snúa við. En það gekk greiðlega að ná hestunum upp og við skelltum á sund að gamni okkar áður en við komum í land. Það ætti enginn að fara þetta án kunnugra manna og alls ekki að láta sér detta í hug að fara yfir með rekstur."