Kaupa auglýsingu fyrir viðtal

Athafnakona í Reykjavík fékk símtal frá Frjálsri verslun fyrir skemmstu þar sem henni var boðið í heilsíðuviðtal. Sá bögull fylgdi skammrifi að skilyrði fyrir viðtalinu var að konan keypti heilsíðuauglýsingu fyrir fyrirtæki sitt. Konan spyr sig nú hvort karlar í viðskiptalífinu, sem nýlega var fjallað um, hafi allir keypt sér aðgang að blaðinu eða hvort þetta eigi eingöngu við um konur. Helga Waage, tækniþróunarstjóri hjá Hex, segir að henni hafi fundist þetta áhugavert frá ýmsum hliðum en fyrirtækið hafi þá stefnu að kaupa ekki umfjöllun í fjölmiðlum. Hún kvaðst undrandi á að þetta væri þarft því hún teldi að blað af þessu tagi hefði það mikla útbreiðslu að það gæti tekið viðtal við fólk sem það teldi áhugavert án þess að láta það greiða fyrir viðtalið. Helga segist spyrja sig hvort þetta viðgangist líka þegar um sé að ræða karla í viðskiptalífinu eða hvort konum sé eingöngu gert að kaupa sér aðgang að fjölmiðlum. Hún segir að málið hafi vakið sterk viðbrögð hjá konum sem hún hafi rætt við. „Við teljum að sjálfsögðu að við séum svo áhugaverðar að menn vilji tala við út af því sem við höfum að segja en ekki vegna þess að við séum að borga fyrir auglýsingu á sama tíma,“