Nýtt evrópskt sjúkratryggingakort

Tryggingastofnun hóf í gær útgáfu á nýju evrópsku sjúkratryggingakorti. Gert er ráð fyrir að stofnunin gefi út 30 þúsund kort á þessu ári.  Kortið tryggir að viðkomandi greiðir aðeins hluta sjúklings í læknisþjónustu og lyfjum en þarf ekki að leggja út fyrir heildarupphæðinni og sækja um endurgreiðslu þegar heim er komið. Karl Steinar Guðnason, forstjóri Tryggingastofnunar, segir þetta til heilmikilla þæginda fyrir fólk sem veikist á ferðalagi í Evrópu. Flestar Evrópuþjóðir hafa gefið út sjúkratryggingakort og er reiknað með að um 50 milljón slík kort verði gefin út á þessu ári. Áður en nýja kortið var gefið út þurfti að fylla út sérstakt eyðublað sem gilti fyrir alla fjölskylduna en kortin eru gefin út á nöfn einstaklinga. Karl Steinar segir þetta afurð Evrópusambandsins og að Íslendingar taki þátt í þessu.