Vill Schröder úr pólitík

Krafa um að Gerhard Schröder, kanslari Þýskalands, ætti að láta af baráttu sinni um að halda embættinu, þriðja kjörtímabilið í röð, barst úr heldur óvenjulegri átt í morgun. Hálfbróðir Schröders, Leo Vosseler, segir í viðtali við þýska fjölmiðla að hann vildi óska þess að Schröder væri ekki undir eins miklum þrýstingi og raun ber vitni og að best væri fyrir hann að hætta í stjórnmálum. Jafnaðarmannaflokki Schröders tókst ekki að tryggja sér meirihluta á þýska sambandsþinginu í kosningum sem haldnar voru í landinu um þarsíðustu helgi en flokkur Angelu Merkel, Kristilegir demókratar, fékk mest fylgi þótt hann næði ekki heldur meirihluta. Merkel og Schröder áforma að hittast síðar í vikunni til að ræða hugsanlegt stjórnarsamstarf stóru flokkanna, en Merkel segir formlegar viðræður þó ekki koma til greina nema Schröder sætti sig við að hún leiði viðræðurnar.