Hnattrænni hlýnun ekki snúið við

Vísindamenn óttast nú að svo mikið af ísnum á norðurpólnum hafi bráðnað að hnattrænni hlýnun verði ekki snúið við. Frá þessu er greint í breska blaðinu Independent í dag. Við gervihnattarmælingar á umfangi íssins í lok ágúst kom í ljós að umfang heimskautaíssins hefur aldrei verið minna og sú bráðnun sem varð í mánuðinum á sér ekki fordæmi í hundruð ef ekki þúsund ár. Heimskautaísinn hefur hingað til bráðnað á sumrin en safnast aftur upp á veturna en nú er svo komið að bráðnunin er nokkuð meiri en uppsöfnunin. Vísindamenn telja að ákveðinn vítahringur hafi tekið við þar sem ísinn bráðnar svo hratt að allt umhverfið dregur til sín meiri varma frá sólinni sem aftur leiðir til enn meiri bráðnunar. Bráðnunin mun einnig hafa áhrif á meginlandsís Grænlands, að sögn vísindamannanna, og ef fram haldi sem horfi verði allur heimskautaís horfinn af norðurpólnum árið 2070. Bráðnunin mun einnig leiða til hækkunar sjávarborðs með tilheyrandi hættu fyrir mannabyggðir sem liggja lágt.