Enn ein mannskæð árás í Írak

Ellefu létust og 24 særðust þegar sjálfsmorðssprengjuárásarmaður sprengdi sig í loft upp fyrir utan mosku sjíta í bæ norður af Bagdad. Fjöldi fólks var á leið úr moskunni eftir föstudagsbæn þegar árásin var gerð, en hún er sú nýjasta í hrinu árása sem gerðar hafa verið í Írak síðustu daga. Ríflega 200 manns hafa látist í árásum vígamanna undanfarna þrjá daga, en leiðtogi al-Qaida í landinu, Abu Musab al-Zarqawi, hefur lýst yfir stríði á hendur sjítum. Þá handtók lögregla mann með sprengjubelti um sig miðjan á svipuðum slóðum og er talið að hann hafi starfað með sjálfsmorðsárásarmanninum við moskuna. Fyrr í dag drápu byssumenn tvo og særðu á annan tug manna sem hafði hópast saman í von um að fá vinnu.