Laun æðstu ráðamanna hækka

Laun æðstu ráðamanna landsins hækka um tvö prósent í júlí samkvæmt úrskurði Kjaradóms í dag. Hækkunin kemur til viðbótar þriggja prósenta launahækkun um áramótin sem var í takt við almenna kjarasamninga. Gylfi Arnbjörnsson, framkvæmdastjóri ASÍ, segir þetta benda til að Kjaradómur telji almennar launahækkanir ekki nægjanlegar. Eftir hækkunina verða mánaðarlaun forseta Íslands rúm ein og hálf milljón króna. Forsætisráðherra fær 915 þúsund krónur og aðrir ráðherrar 825 þúsund krónur, hvort tveggja að meðtöldu þingfararkaupi sem hækkar í 460 þúsund krónur.