Nýtt síldarævintýri í uppsiglingu?

Síld gengur nú svo gott sem inn á firði fyrir austan en hún hefur ekki sést jafn nærri Íslandsströndum í áratugi. Þetta er talið styrkja samningsstöðu Íslendinga í viðræðum við Norðmenn um veiðar úr norsk-íslenska stofninum. Menn eru kampakátir í Síldarvinnslunni í Neskaupstað þessa dagana. Þar er búið að landa meira en þúsund tonnum af síld og meira er á leiðinni. Aðspurður hvort nýtt síldarævintýri sé í uppsiglingu segist Gunnþór B. Ingvason, aðstoðarmaður forstjóra Síldarvinnslunnar, vona það. Sú síld sem hann hefur frétt af næst landi er 35 sjómílur út af Langfjarðará.  Gunnþór segir síldina vera flakaða og frysta og að í Neskaupstað vonist menn til að aflinn verði áfram jafn góður næstu daga og vikur. Hann segir trollskipin flest hafa fengið fínan afla en nótaskipin eitthvað minna. Gunnþór segir einnig ljóst að þessi ganga síldarinnar inn í íslenska lögsögu styrki tvímælalaust samningsstöðu Íslendinga gagnvart Norðmönnum. En það sé eins og alltaf með síldina - menn fagni bara á meðan hún er og sjái svo til.