Fjórðu hverri fyrirspurn ósvarað

Fjórðu hverri fyrirspurn sem beint var til ráðherra ríkisstjórnarinnar á haustþingi er enn ósvarað. Lög kveða engu að síður á um að þeir skuli svara fyrirspurnum í síðasta lagi rúmri viku eftir að fyrirspurn er beint til þeirra. Forseti Alþingis segir að stöðugt sé reynt að leysa vandann. Ráðherrum ríkisstjórnarinnar bárust 226 fyrirspurnir á Alþingi á tímabilinu og eru þá ekki taldar með nokkrar sem síðar voru afturkallaðar. Af þessum 226 fyrirspurnum hafa þeir svarað 169 en 57 er enn ósvarað, eða fjórðungi allra fyrirspurna. Í lögum um þingsköp kemur fram að fyrirspurn skuli ekki tekin á dagskrá síðar en átta dögum eftir að henni var útbýtt og ekki síðar en 10 dögum ef óskað var eftir skriflegu svari. Það má því ráða af þessum heimtum á svörum við fyrirspurnum að ekki sé staðið við þessi ákvæði þingskaparlaga. Ráðherrarnir standa sig mjög misjafnlega í að svara fyrirspurnum. Verstar eru heimturnar hjá Davíð Oddssyni utanríkisráðherra. Honum bárust 8 fyrirspurnir á haustþingi og hann svaraði einungis fjórum. Til þess ber þó að líta að hann hefur átt við alvarleg veikindi að stríða. Næstflestar ósvaraðar fyrirspurnir liggja hjá Jóni Kristjánssyni heilbrigðisráðherra, eða 37 prósent. Forsætisráðherra hefur ekki svarað þriðjungi þeirra sem honum hafa borist, umhverfisráðherra hefur ekki svarað 32 prósentum fyrirspurna, landbúnaðarráðherra 29 prósentum og dómsmálaráðherra 26 prósentum. Menntamálaráðherra hefur ekki svarað einum fjórða þeirra fyrirspurna sem til hans hefur verið beint og viðskipta- og iðnaðarráðherra er á svipuðum slóðum. Samgönguráðherra á enn eftir að svara fimmtu hverri fyrirspurn sem hann fékk í fyrrahaust og félagsmálaráðherra hefur ekki svarað 18 prósentum fyrirspurna. Fjármálaráðherra hefur ekki svarað 17 prósentum en dúxinn í ríkisstjórninni er sjávarútvegsráðherra. Hann svaraði hverri einustu fyrirspurn sem hann fékk í fyrrahaust. Halldór Blöndal, forseti Alþingis, segir að málið sé reglulega á dagskrá forsætisnefndar og að á morgun verði byrjað á hádegi að svara fyrirspurnum en ekki klukkan hálfeitt eins og venja er á miðvikudögum.