Sátt hefur ekki skapast

Gunnar Örn Ólafsson, formaður stjórnar Landakotsskóla, og Jóhanna Long, ritari stjórnarinnar, sögðu af sér á föstudag í því skyni að sátt mætti skapast um framtíð skólahalds í Landakotsskóla. Björg Thorarensen, prófessor og foreldri, og Þórunn Erhardsdóttir, formaður foreldraráðs, tóku sæti þeirra í stjórninni. Séra Hjalti Þorkelsson, fráfarandi skólastjóri Landakotsskóla, segist ekki hafa óskað eftir endurráðningu sem skólastjóri og að hann muni ekki undir neinum kringumstæðum taka við því starfi aftur, hvort sem skólastjórnin sitji áfram eða ekki. Í gær barst svo yfirlýsing frá sjö kennurum við Landakotsskóla þar sem segir að kennararnir muni ekki sætta sig við starfsaðstæður þar sem vinnubrögð fyrrverandi kennararáðs og skólanefndar séu í heiðri höfð. "Sú afstaða fyrrverandi skólanefndar að hlusta á rógburð kennararáðsins fyrrverandi, víkja fyrrverandi aðstoðarskólastjóra úr starfi á grundvelli rógsins og án áminningar eða andmælaréttar, stinga rógbréfinu undir stól og neita að afhenda það, þeim sem málið varða, þrátt fyrir eftirgang úrskurðarnefndar upplýsingamála, sýnir svo siðlausa og ófaglega afstöðu og einbeittan brotavilja, að við slíkt verður aldrei unað," segir í yfirlýsingunni.