Góð þátttaka í Kvennahlaupi

Hátt í tuttugu þúsund konur tóku þátt í Kvennahlaupi Íþróttasambands Íslands á yfir níutíu stöðum á landinu í dag. Langflestar eða um fimm þúsund hlupu í Garðabænum. Það ríkti mikil stemning á Garðatorgi í Garðabæ þar sem hitað var upp fyrir Kvennahlaupið. Bláu bolirnir voru allsráðandi og konur á öllum aldri mættar á svæðið til að láta ekki sitt eftir liggja. Yfirskrift hlaupsins í ár var Áfram stelpur! og var tilgangurinn að vekja athygli á mikilvægi þess fyrir konur og ungar stúlkur að eiga sér heilbrigðar og sterkar fyrirmyndir. Þátttakendur gátu valið um að fara 2, 5, 7 eða 9 kílómetra, annaðhvort hlaupandi, gangandi, á línuskautum eða í kerrum. Aðstandendur kvennahlaupsins voru ánægðir með daginn. Gígja Gunnarsdóttir, framkvæmdastjóri Kvennahlaupsins, segir að það hafi sýnt sig í gegnum árin að hlaupið sé gríðarleg hvatning fyrir konur, þetta sé almenningsíþróttaviðburður þar sem konur geti tekið þátt á sínum forsendum og farið á sínum hraða. Þátttakendafjöldinn hafi sýnt að þetta henti konum. Og það var víðar hlaupið en á höfuðborgarsvæðinu. Á Egilsstöðum tók fjöldi kvenna þátt í hlaupinu og þar var góð stemning. Veðurskilyrði voru með besta móti á flestum stöðum landsins og því tilvalið fyrir konur að njóta útiverunnar.