Bílsprengjuárás á sendiráð Slóvaka

Fjórir særðust þegar tilræðismaður sprengdi sig og pallbíl sinn í loft upp fyrir utan sendiráð Slóvakíu í Bagdad í Írak í dag. Maðurinn hugðist aka upp að sendiráðinu en var stöðvaður við hliðið fyrir utan sendiráðið og í kjölfarið sprengdi hann sig í loft upp. Nokkrir starfsmenn voru í sendiráðinu þegar sprengingin varð en engan þeirra sakaði. Hins vegar skemmdist hliðið og sendiráðið sjálft nokkuð. Utanríkisráðuneyti Slóvakíu vissi ekki hvort árásinni hefði sérstaklega verið beint gegn Slóvakíu. Um hundrað manns á vegum slóvakíska hersins eru að störfum í Írak en landið styður aðgerðir Bandaríkjanna í Írak.