Foktrygging innifalin í kaskó

Þeir sem eru þokkalega tryggðir og misstu hjólhýsi sín eða fellihýsi í óveðrinu á sunnudaginn þurfa ekkert að óttast. Sérstök trygging fyrir þessi hjól- og tjaldhýsi, svo og kaskótrygging bílanna, gildir þar sem um ofsaveður var að ræða. Árni Gunnarsson framkvæmdastjóri tjónasviðs Sjóvá segir engan enn hafa haft samband við þá vegna tjóns á fellihýsum eða hjólhýsum um helgina. Hann sagði tryggingum vera þannig háttað að ef vindhraði fer yfir 28,5 metra á sékúndu þá bætir kaskótrygging bæði bifreiðar og fellihýsis tjónið. Hann sagði sama gilda og um foktjón á fasteignum. Hann sagði þessa skilgreiningu vera notaða því veður af þessu tagi er talið vera óveður og væntanlega vegna þess að tjón verða yfirleitt ekki við minna rok. Hann sagði vindinn hafa farið yfir þessi mörk síðastliðinn sunnudag.