Vopnahléið kvatt

Til harðra átaka kom á milli palestínskra lögreglumanna og liðsmanna Hamas-samtakanna í Gaza-borg í morgun með þeim afleiðingum að tveir óbreyttir borgarar féllu og að minnsta kosti 25 særðust. Átökin eru talin þau alvarlegustu um árabil en þau brutust út er lögreglumenn leituðu manna sem staðið hafa á bak við flugskeytaárásir á byggðir Ísraela að undanförnu. Þeir sem létust í átökunum voru unglingur og barn en liðsmenn Hamas-samtakanna kveiktu í lögreglustöð og nokkrum bílum í átökunum. Nasser Yousef, yfirmaður palestínsku öryggissveitanna, sagði í morgun að sveitirnar muni ekki hika við að koma á lögum og reglu á sjálfstjórnarsvæðunum og að flugskeytaárásir herskárra samtaka Palestínumanna verði stöðvaðar. Fimm Ísraelar hafa látið lífið í árásum herskárra Palestínumanna undanfarna viku en fleiri hafa ekki látið lífið í hryðjuverkum á svæðinu frá því leiðtogar þjóðanna lýstu yfir vopnahléi í febrúar. En Ísraelar svara með ofbeldi og létust fimm menn í flugskeytaárás hersins á bíl eins af liðsmönnum Hamas-samtakanna í bænum Salfit á Vesturbakkanum í dag. Árásin er fyrsta flugskeytaárás Ísraelshers frá því á síðasta ári. Vopnahlé virðist því vera á enda því ekki ólíklegt að hefnt verði fyrir þessar árásir eins og allar aðrar.