Sviss opnar fyrir frjálsa för

Svisslendingar samþykktu í þjóðaratkvæðagreiðslu í gær að borgurum hinna tíu nýju aðildarríkja Evrópusambandsins yrði heimilt að leita sér að vinnu í Sviss, samkvæmt sömu skilmálum og aðrir borgarar Evrópska efnahagssvæðisins njóta. Um 56 af hundraði svissneskra kjósenda greiddu atkvæði með tillögu ríkisstjórnarinnar um að opna fyrir frjálsa för vinnuafls milli Sviss og ríkjanna tíu sem gengu í Evrópusambandið og EES hinn 1. maí í fyrra, átta fyrrverandi austantjaldslanda og Miðjarðarhafseyríkjanna Kýpur og Möltu. Í Sviss var málið mjög umdeilt og því þykir samþykkt tillögunnar mikilvægur áfangi að því að tengja Sviss Evrópusamrunanum nánar. Fyrir fjórum mánuðum samþykktu Svisslendingar aðild landsins að Schengen-vegabréfasamstarfinu. Sviss er hvorki aðili að Evrópusambandinu né Evrópska efnahagssvæðinu en er nátengt því með tvíhliða samningum við ESB. Samningarnir um Schengen-aðildina og frjálsa för vinnuafls eru nýjustu viðbæturnar við þessa tvíhliða samninga.