Fengu blys í veiðarfæri

Sprengjusérfræðingar Landhelgisgæslunnar fjarlægðu og eyddu fosfórblysi sem kom upp með veiðarfærum fiskiskipsins Draupnis á Selvogsbanka suður af landinu. Skipverjar höfðu samband við Landhelgisgæsluna og sögðust hafa fengið upp "torkennilegan og illa lyktandi hlut". Skipið kom til hafnar í Þorlákshöfn aðfaranótt þriðjudags og kom þá í ljós að hluturinn var fosfórblys af gerðinni Mark 58, en það inniheldur bæði sprengiefni og fosfór. Landhelgisgæslan ítrekar þau tilmæli að fólk snerti ekki slík blys finnist þau á ströndum landsins, heldur láti vita af þeim.