Hasselbaink yfirgefur Chelsea

Hollendingurinn Jimmy Floyd Hasselbaink hefur yfirgefið herbúðir enska úrvalsdeildarfélagsins Chelsea. Þetta hefur umboðsmaður hans, Humphry Nijman, staðfest: "Við náðum samkomulagi við Chelsea og Jimmy er nú frjáls ferða sinna." Hinn þrjátíu og tveggja ára gamli Hasselbaink hefur verið orðaður við skosku stórliðin, Glasgow Celtic og Glasgow Rangers: "Það eru nokkur önnur lið áhugasöm en Jimmy hefði ekkert á móti því að spila í Skotlandi en auðvitað munum við skoða öll tilboð vandlega," sagði Nijman og bætti við: "Eitt félag hefur þegar gert Jimmy tilboð en ég vil ekki greina frá hvaða félag það er að svo stöddu. Þá fékk Jimmy á sínum tíma mjög gott tilboð frá Japan en hann var ekki tilbúinn að flytja búferlum þangað. Jimmy er mjög metnaðarfullur leikmaður og vill fara þangað sem hann getur unnið titla."