Ung frjálsíþrótta­kona lést í fríi með fjöl­skyldunni

Stapleton var spretthlaupari og vann meðal annars til bronsverðlauna á hinu virta Stawell Gift hlaupamóti í Melbourne í fyrra.

Ekki hefur verið gert opinbert hvernig hún lést en á söfnunarsíðu fyrir fjölskyldu hennar segir að hún hafi látist af slysförum.

„Það er með mikilli sorg sem við tilkynnum að kærir vinir okkar, Stapleton-fjölskyldan, standa frammi fyrir ómældri sorg eftir að hafa misst sína ástkæru dóttur, systur og maka, Jemmu, í fríi með fjölskyldunni,“ segir á söfnunarsíðunni þar sem í gær höfðu þegar safnast yfir 13 milljónir króna.

Tyler Gray, maki Stapleton, skrifaði á Instagram: „Ég fæ ekki með orðum lýst sársaukanum sem ég finn fyrir. Þú ert það besta sem hefur komið fyrir mig og ég er svo þakklátur fyrir ástina sem við deildum. Ég elska þig af öllu mínu hjarta.“

Bróðir hennar, Joel, birti einnig minningarorð á Instagram-síðu sinni og skrifaði: „Hvíl í friði. Ég elska þig svo mikið, ég lofa að gera þig stolta. Þú varst besta systir og besta vinkona mín, ég mun sakna þín að eilífu.“

Utanríkisráðuneyti Ástrala hefur gefið út að fjölskyldunni verði veitt aðstoð í Taílandi og fjölskyldan er þakklát fyrir þann hlýhug sem ástralska þjóðin hefur sýnt henni.

„Við höfum fengið óteljandi skilaboð og fjárframlög og erum klökk yfir því. Takk fyrir,“ sagði pabbi Stapleton og bætti við:

„Ef þið getið, látið þá sem eru í kringum ykkur vita að þið elskið þá og faðmið þá að ykkur. Maður veit aldrei hvenær maður fær að gera það í síðasta sinn.“