Stefnan kemur Hannesi á óvart

Hannes Hólmsteinn Gissurarson segir stefnu á hendur honum vegna ritstuldar úr verkum Halldórs Laxness koma á óvart. Hann segir dætur skáldsins hafa fengið að gera athugasemdir við próförk bókarinnar og að hann hafi tekið tillit til þeirra athugasemda.  Auður Laxness, ekkja Halldórs og handhafi höfundarréttar bóka hans, hefur stefnt Hannesi Hólmsteini fyrir ritstuld og krefst 7,5 milljóna króna í bætur. Málið verður tekið fyrir í Héraðsdómi Reykjavíkur á morgun. Fjölskylda Halldós segir að um 270 tilfelli af hreinum ritstuld sé að finna í fyrstu bók Hannesar Hólmsteins um Halldór en stefnan tiltekur 120 dæmi. Hannes segir stefnuna koma sér á óvart því þegar hann skrifaði bókina hafi hann lagt áherslu á að brjóta engan höfundarrétt, enda hafi hann engan áhuga á að brjóta lög. Hannes segir dætur skáldsins og Pétur Má Ólafsson hafa fengið að gera athugasemdir við próförk bókarinnar. Þær athugasemdir hafi verið við beinar tilvitnanir í óprentuð rit og að hann hafi farið eftir þeim öllum. Hannes segir þau hins vegar ekki hafa gert athugasemdir við það sem komi skýrt fram í eftirmálanum að hann hafi nýtt sér lýsingar Halldórs á æsku sinni og ýmsum atburðum úr ævi sinni. Spurður hvers vegna hann telji að Auður Laxness gangi fram með þessum hætti fyrst Hannes hafi tekið tillit til athugasemdanna segist Hannes telja að dætur Halldórs standi á bak við þetta og segi hann þær á móti því að hann skrifi bók um skáldið. „Í stefnunni er talað um að ég sé að skrifa þessa bók í heimildarleysi. Ég vona að sá tími komi nú ekki á Íslandi að menn þurfi sérstakt leyfi frá fjölskyldum fólks til að skrifa bækur um merka menn,“ segir Hannes Hólmsteinn.    Um er að ræða fyrstu bókina af þremur sem Hannes Hólmsteinn ætlar að rita um ævi og störf Nóbelsskáldsins. Þrátt fyrir að vinnubrögð hans við fyrsta bindið verði tekin fyrir hjá dómstólum þá virðist það á engan hátt letja rihöfundinn sem gert hefur uppkast að öðru og þriðja bindi. Hannesi finnst það miður að fjölskylda Laxness sé andvíg því að hann skrifi um skáldið, m.a. vegna þess að hann telur að skrifin séu til þess fallin að vekja áhuga fólks á að lesa bækur Halldórs fremur en hitt.  Spurður hvort ritstuldur sé eitthvað sem hann sé ekki sekur um kveðst Hannes segja skýrt frá því í eftirmála bókar sinnar að hann hafi stuðst við lýsingar Halldórs á ævi hans. „Ég dreg hvergi dul á það og vísa mjög oft í þessi rit hans þannig að það liggur alveg ljóst fyrir, og ég faldi hvergi hvaða heimildir ég notaði,“ segir Hannes Hólmsteinn Gissurarson, prófessor og rithöfundur.