Flóki drap ekki féð

"Það er rangt að Flóki hafi drepið fé sitt úr hor," segir Ragnar Guðmundsson á Brjánslæk. Honum er annt um mannorð Hrafna-Flóka sem hafðist við á Brjánslæk í eitt ár á sinni tíð en þá hét Brjánslækur reyndar ekki Brjánslækur heldur eitthvað allt annað eða kannski ekki neitt. "Hið rétta er að Geirmundur heljarskinn fann hjörð þegar hann nam land hér á nesinu fyrir handan og það var hjörð Flóka," segir Ragnar með þunga í röddinni. Tilgáta hans er að féð hafi týnst í skóginum en í þá daga var landið skógi vaxið. "Ég hef enga trú á að Flóki hafi ekki hugsað um fé sitt." Þrálátur orðrómur um að hjörð Flóka hafi drepist úr hor fer fyrir brjóstið á Ragnari sem vill að hið sanna komi í ljós. Hann erfði áhugann á Flóka frá föður sínum og vinnur að því ljóst og leynt að halda minningu hans á lofti. Liður í því er að koma á fót Hrafna-Flóka safni í kjallara nærliggjandi prestsseturs sem Ragnar dundar sér við að gera upp þessa dagana. Tóftir Flóka eru sýnilegar og standa vonir til að þær verði grafnar upp í bráð.