Bæjarstjórn samþykkti blokkir

Bæjarstjórn Seltjarnarness samþykkti í gær að fjórar umdeildar blokkir yrðu byggðar á Hrólfsskálamel en ákvað um leið að koma til móts við andstæðinga framkvæmdanna með því að fækka íbúðum og lækka húsin. Minnihlutinn telur breytingarnar ganga of skammt. Áform um að reisa fjögur fjölbýlishús við Suðurströnd hafa mætt verulegri andstöðu meðal bæjarbúa og bárust bæjarstjórn undirskriftalistar með nöfnum 924 einstaklinga sem mótmæltu fyrirhuguðu skipulagi. Bæjarstjórn Seltjarnarness afgreiddi aðalskipulag í gær með þeim breytingum að heildarfjöldi íbúða var lækkaður um einn sjötta, eða úr 180 niður í 150, jafnframt því sem nýtingarhlutfall á svæðinu var lækkað samsvarandi. Í bókun meirihluta Sjálfstæðisflokks er bent á að um leið og dregið sé úr byggingarmagni og íbúðum fækkað verði byggingar lækkaðar frá því sem ráðgert var og húsagerð og byggðamynstri breytt með hliðsjón af byggð við Bakkavör. Jónmundur Guðmarsson bæjarstjóri segir að með þessu sé komið verulega til móts við þá sem gert hafi athugasemdir við skipulagið og þar með reynt að skapa betri sátt um niðurstöðuna. Minnihluti Neslistans bókaði hins vegar að breytingarnar gengju of skammt og kæmu aðeins að takmörkuðu leyti komið til móts við þá miklu andstöðu sem byggingaráformin hefðu mætt.