Enn frekari einkarekstur

Þorvaldur Gylfason, prófessor við Háskóla Íslands, segir nauðsynlegt að koma heilbrigðisþjónustunni út úr þeim ógöngum sem hún er í með því að leyfa enn frekari einkarekstur. Þetta kom fram á málþingi sem Samfylkingin stóð fyrir þar sem rætt var um einkarekstur í íslensku heilbrigðiskerfi. Sigurður Guðmundsson landlæknir sagði á ráðstefnunni að dæmi væru um að faglegt eftirlit versnaði við einkavæðingu og þjónustan einnig. Stutt væri milli einkareksturs og hreinnar einkavæðingar og menn yrðu að fara varlega. Þorvaldur Gylfason var hinsvegar á öðru máli og sagði að rannsóknir sýni að þá sé hægt að veita betri þjónustu í einkarekstri fyrir minna fé. Ekki megi heldur rugla saman jöfnuði og jafnrétti. Fólk hafi ólíkar þarfir og ólík áhugamál. Þorvaldi finnst reynslan hér á landi benda til þess að hinn sjálfsprottni einkaekstur í heilbreigðisgeiranum gefi góða raun. Þetta birtist í meiri og betri þjónustu með lægri kostnaði en völ er á við þá miðstýrðu skipan sem tíðkast þegar ríkið sér eitt um þjónustuna, eðli málsins samkvæmt. Þorvaldur gefur ekki mikið fyrir gagnrýni þeirra sem telja að heilbrigðis- og menntastofnanir hafi markvisst verið sveltar í átt til frekari einkavæðingar og fjárþurrð þessarra stofnana væri af pólitískum rótum runnin. Hann segist samt skilja þau sjónarmið sem að baki þessu búi. „En það er miklu betra að láta ekki eina kreppu af annarri hrekja sig í átt að skynsamlegri niðurstöðu. Það er miklu betra að gera þetta af fúsum og frjálsum vilja. Ég er samt ekki að mæla fyrir því að einkarekstur verði allsráðandi í heilbrigðisþjónustunni. Ég er einfaldlega að lýsa eftir betri málamiðlun en er við lýði núna,“ segir Þorvaldur.