Friðargæslustarfið heldur áfram

Íslensk stjórnvöld fordæma harðlega sprengjuárásina í Kabúl í Afganistan í gær og yfirlýsingu Talíbana í kjölfar hennar. Halldór Ásgrímsson forsætisráðherra segir að atburðirnir í Kabúl hafi engin áhrif á starf Íslensku friðargæslunnar þar. Ögmundur Jónasson alþingismaður segir að stjórnvöld hafi leynt og ljóst verið að koma upp vísi að íslenskum her. Forsætisráðherra segir atburðinn í gær hörmulegan. Íslendingar muni samt áfram starfa í Afganistan eins og þeir hafi skuldbundið sig til að gera. Farið verði yfir öryggisráðstafanir ásamt samstarfsþjóðunum. Einar K. Guðfinnsson, þingmaður Sjálfstæðisflokksins, segist harma atburðinn en hann undirstriki fyrst og fremst að Íslendingum beri að halda uppi öflugri öryggisgæslu í Kabúl. Össur Skarphéðinsson, formaður Samfylkingarinnar, segir þetta sorglegan atburð og hann hugsi til mannanna sem lentu í árásinni. Þetta sé þeim mun sorglegra sem þeir séu beinlínis staddir í Afganistan til að stilla til friðar. Ögmundur Jónasson, þingmaður Vinstri grænna, segir að stjórnvöld hafi leynt og ljóst verið að koma upp vísi að íslenskum her án þess að nein pólitísk ákvörðun liggi fyrir um það. Mennirnir séu til að mynda undir vopnum og beri hertitla. Einar K. Guðfinnsson segir ósmekklegt að ráðast á íslensku friðargæsluna með þessum hætti og af þessu tilefni. Honum finnst þetta undarleg tilraun til að reyna að koma höggi á friðargæslustarfsemi Íslendinga sem fengið hafi lof alþjóðasamfélagsins. Einar segir að það beri að harma og fordæma slík vinnubrögð og pólitískan keiluslátt. Spurður hvort íslensku friðargæslumennirnir séu hermenn, líkt og Reuters hélt fram í fréttaskeyti í morgun, segir Halldór Ásgrímsson að þeir séu vopnaðir og hafi því möguleika til sjálfsvarnar, en þeir séu ekki hermenn. Þeir lúti aga og beri titla en forsætisráðherra vill ekki kalla það „heraga“ eða líkja titlunum við þá sem tíðkast innan herja. „Við erum ekki með her en að sjálfsögðu þarf að skipuleggja mál með öðrum hætti en til dæmis hér á landi þegar svona ástand er,“ segir Halldór. Forsætisráðherra segir fulla ástæðu til að auka öryggi Íslendinganna meira en verið hefur til þessa. Hann segir að farið verði yfir þau mál ásamt samstarfsþjóðum Íslands í Afganistan. Spurður hvort Samfylkingin taki undir með Vinstri grænum að þarna sé um vísi að íslenskum her að ræða segir Össur erfitt að segja hvort þarna sé um her að ræða. Hitt sé ljóst að friðargæsluliðarnir gangi inn í hernaðarskipulag, eru vopnaðir og í einkennisbúningi og því auðvelt að skilgreina þá sem hermenn. Össur segir þetta hluta af því að við höfum afráðið sem þjóð að axla meiri byrðar innan NATO og alþjóðlegs hálparstarfs og flokkurinn sé á því að Ísland eigi í vaxandi mæli að axla slíkar byrðar.