Kópavogur vildi sérsamninga

Eftir að ljóst varð að kennarar voru ekki tilbúnir að ganga að tillögu ríkissáttasemjara í kjarabaráttu þeirra við sveitarfélögin íhugaði Kópavogsbær að ganga að kröfum Kennarasambandsins og semja sér við sína kennara. Hefði það þýtt um 15 þúsund hærri byrjunarlaun á mánuði í árslok 2007 en tillaga ríkissáttasemjara hljóðaði upp á, samkvæmt heimildum. Gunnar I. Birgisson, formaður bæjarráðs Kópavogs, kannast ekki við sérsamninga við kennara. Samningsumboðið hafi launanefndin og við það verði staðið: "Ég tel það mjög óklókt ef sveitarfélögin semja við kennara í sitt hvoru lagi," segir Gunnar. Ástæðuna segir hann að einhverjir yrðu hugsanlega óskynsamir og semdu um launahækkanir sem þeir ræðu ekki við. Heimildir herma að kennarar bæjarins hafi leitað álits á því hver afstaða annarra kennara yrði klyfu þeir sig úr hópnum. Voru vangaveltur um hvort það kæmi illa við kennara minnstu sveitarfélaganna. Niðurstaðan hafi verið sú að sérsamningur gæti gefið fordæmi. Kennarar íhugi því að taka tilboði bæjarins