Slitnaði upp úr viðræðum

Upp úr viðræðum grunnskólakennara og sveitarfélaga slitnaði nú undir kvöld. Ríkissáttasemjari lagði fyrir deilendur í dag hugmynd að lausn sem ekki náðist sátt um. Hann hyggst ekki boða til nýs sáttafundar fyrr en eftir hálfan mánuð. Samkvænt heimildum Stöðvar 2 hefur Ásmundur Stefánsson ríkissáttasemjari i dag og í gær unnið að því að setja saman tillögu að lausn deilunnar. Seint í gærkvöldi þegar deiluaðilar héldu heim var farið að gæta bjartsýni í Kaphúsinu um að samningsgrundvöllur væri að finnast. Ásmundur hélt áfram í dag að þróa tillögu sína og nú á fimmta tímanum gerði hann úrslitatilraun en þessar myndir voru einmitt teknar þegar hann kallaði oddvita deiluaðila til hins afdrifaríka fundar þegar slitnaði upp úr. Þegar menn sneru til baka um tuttugu mínútum var greinilegt að mönnum var brugðið. Þetta er hryggilegt, voru orð eins samningamanna. Ásmundur segir stöðun þá að gerð hafi verið úrslitatilraun að lausn, sem ekki hafi gengið upp. Því sé fyrirséð að nokkur bið verði á lausn. Fundur verði ekki fyrr en eftir hálfan mánuð, nema ef annar hvor aðilinn biðji um annað. Ásmundur segist ekki ætla að gera efnislega grein fyrir tillögu sinni. Það sem máli skipti sé að hún hafi ekki gengið upp. Birgir Björn Sigurjónsson, formðaur samninganefndar sveitafeálganna segist ekki vilja tjá sig um í hverju tillagan hafi falist eða hve mikið beri á milli deiluaðila. Birgir segir að sveitarfélögin hafi lagt sig mikið fram upp á síðkastið, en það hafi ekki dugað. Hann segist ekki vilja tjá sig um afstöðu kennara, en ljóst sé að ekki hafi verið hægt að ganga lengra. Fulltrúar kennara fengust ekki til að ræða við Stöð 2 nú undir kvöld í Karphúsinu. Þeir lokuðu sig inni og ræddu saman. Samningamenn sveitarfélaga héldu hins vegar heim nú um sexleytið.