Eru búnir að gefa skýrslu

Mennirnir þrír, sem réðust á fréttastjóra DV í gær og gengu berserksgang á ritstjórn blaðsins, gáfu lögreglu skýrslu í dag. Fréttastjórinn kærði mennina í morgun. Á annan tug manna, sem urðu vitni að atburðunum, gefur skýrslu hjá lögreglu á morgun. Lögregla náði í gærkvöldi símasambandi við mennina þrjá sem laust eftir hádegi í gær birtust á ritstjórn DV í gær og tóku þar fréttastjórann kverkataki og frömdu eignaspjöll á innanstokksmunum. Þeir lofuðu þá að mæta til lögreglu til skýrslutöku í dag og voru mættir upp á stöð laust fyrir klukkan eitt. Yfirheyrslum lauk um klukkan tvö og fóru mennirnir þá leiðar sinnar. Eftir því sem Fréttastofan kemst næst, viðurkenna mennirnir allir að hafa verið á ritstjórn DV í gær. Þeir tengjast vélhjólaklúbbnum Fáfni, sem gert hefur hosur sínar grænar fyrir Vítisenglum sem er alþjóðlegur félagsskapur rokkara, sem víða um heim hefur verið spyrtur við ofbeldi og eiturlyfjaviðskipti. Reynir Traustason, fréttastjóri DV, sem ráðist var á í gær, lagði fram kæru á hendur mönnunum í morgun og gaf ítarlega skýrslu um atburðarásina. Á morgun fara hátt í 20 starfsmenn DV og Fréttablaðsins, sem urðu vitni að atburðunum til lögreglu og gefa skýrslu. Lögregla reiknar með að ljúka rannsóknarvinnu málsins fyrir klukkan 4 á morgun. Að því loknu verður gengið frá málsgögnum og þau send til ákæruvaldsins sem tekur ákvörðun um hvort ákæra verður gefin út á hendur mönnunum.