Útilokar ekki málsókn gegn ríkinu

Ágreiningur er á milli Þjóðkirkjunnar og ríkisins um eignarréttarstöðu prestssetra. Ríkið hefur boðist til að greiða kirkjunni 150 milljónir króna vegna prestssetra en kirkjan vill hins vegar fá þrjá milljarða í sinn hlut. Árið 1997 var samið um að kirkjujarðir yrðu eign ríkisins en prestssetur voru þar undanskilin. Fimm árum síðar gerði ríkið kirkjunni tilboð þess efnis að hún tæki setrin til eignar og fengi auk þess 150 milljónir króna. Á þetta vildu kirkjunnar menn hins vegar ekki fallast því ríkið skilgreindi prestssetur of þröngt. Björn Bjarnason kirkjumálaráðherra gerði þennan ágreining að umtalsefni á kirkjuþingi í gær. Hann sagðist undrast þá gjá sem myndast hefði á milli ríkis og kirkju og benti á að 1997 hefði sátt verið um hvaða prestssetur flyttust til Prestssetrasjóðs. Karl Sigurbjörnsson biskup, segir að kirkjan hafi lengi leitað eftir viðræðum. "Frá því að okkur var tjáð að forsætisráðherra hefði tekið við málinu höfum við engin skilaboð fengið nema að þessi ræða frá kirkjumálaráðherra sé vísbending um að það sé komið á hans borð," segir Karl og bætir því við að landbúnaðarráðuneytið hafi selt jarðir sem ágreiningur var um hvort tilheyrðu ríki eða kirkju. Hann leggur áherslu á að sjálf fjárhæðin sé ekki aðalatriðið í málinu heldur að þeir sem beri ábyrgð á málefnum kirkjunnar geti ekki látið slík verðmæti af hendi nema að löglega sé að því staðið. Karl segir jafnframt athyglisvert að þegar ríkið bauð kirkjunni 150 milljónir fyrir prestssetrin árið 2002 þá hafi sóknargjöld til trúfélaga verið lækkuð um 150 milljónir um svipað leyti. Biskup segir að ráðherrar hafi gefið í skyn að vilji væri til að semja. "En það er mikið að gera á stóru heimili og kannski erum við ekki nógu hávær í þessu. Hins vegar er ekki hægt að útiloka málsókn ef allt um þrýtur," segir Karl Sigurbjörnsson biskup.