Afturför á íslenskum vinnumarkaði

Nýr formaður Starfsgreinasambands Íslands verður kosinn á ársfundi þess á morgun. Halldór Björnsson, fráfarandi formaður, segir að átökin um Sólbak og uppsagnir flugliða hjá Iceland Express séu dæmi um áratuga afturför á íslenskum vinnumarkaði. Fráfarandi formaður Starfsgreinasambandsins segist halda að helstu umræðu- og átakaefni þingsins sem hefst á Hóteli Loftleiðum í fyrramálið verði sú aðför sem að undanförnu hafi verið gerð að íslenskum vinnumarkaði. Hann nefnir þar sem dæmi átökin um Sólbak og uppsagnir Iceland Express á flugfreyjum félagsins. Að mati Halldórs er það áratuga afturför á íslenskum vinnumarkaði. Halldór segir afar mikilvægt að verkalýðsfélög landsins sýni samtakamátt sinn þegar mál á borð við þessi komi upp. Á þinginu verður kosinn nýr formaður sambandsins sem og nýr varaformaður. Kristján Gunnarsson, formaður Verkalýðs- og sjómannafélags Keflavíkur, býður sig fram til formanns og Björn Snæbjörnsson, formaður Einingar-Iðju á Akureyri, til varaformanns. Félag Kristjáns er hluti af Flóabandalaginu og samanlegt eru þingfulltrúar þess og Einingar-Iðju yfir 60 prósent þingfulltrúa. Það getur því orðið erfitt að skáka þeim, fylgi allir þingfulltrúar sínum mönnum. Þó er ljóst að Signý Jóhannesdóttir, formaður Verkalýðsfélagsins á Siglufirði, ætlar fram og er búist við að hún bjóði sig til varaformanns. Heimildamenn fréttastofu segja hennar möguleika helsta felast í þeirri staðreynd að það vanti konur í fremstu röð Starfsgreinasambandsins, sem og að Kristján og Björn séu báðir umdeildir menn. Halldór Björnsson lætur af formennsku eftir áratugastarf í verkalýðsforystunni. Hann segist nú í fyrsta sinn verða atvinnulaus síðan hann var tvítugur. Halldór segir eftirsjá vissulega bærast með sér en hann sé hins vegar kominn á þann aldur að rétt sé að hætta þessu ati.