Heyrnarlausir fagna framlagi

Þorgerður Katrín Gunnarsdóttir menntamálaráðherra tilkynnti í gær á fundi með fulltrúum heyrnarlausra að framlög til heyrnleysingjatúlkunar hefðu verið aukin um 2 milljónir í ár og 6 milljónir á næsta ári. Yrði alls varið 10 milljónum til táknmálstúlkunar fyrir heyrnarlausa á fjárlögum 2005. "Ég hef sjaldan fengið eins góðar móttökur og á fundinum," sagði Þorgerður Katrín. Hafdís Gísladóttir, framkvæmdastjóri Félags heyrnarlausra, sagðist í sjöunda himni: "Við höfum beðið lengi eftir þessu." Menntamálaráðherra tilkynnti um framlögin á Alþingi í umræðum utan dagskrár um málið að kröfu Samfylkingarinnar. Málshefjandinn Rannveig Guðmundsdóttir sagði: "Þorgerður Katrín fær mörg prik hjá mér fyrir þetta". Samfylkingin hafði óskað eftir að umræðan yrði táknmálstúlkuð en Halldór Blöndal, forseti Alþingis, hafnaði því. Lofaði hann hins vegar að kanna hvort hægt væri að túlka allar umræður úr ræðustól þingsins.