Flugslys á Reykjavíkurflugvelli

Tilkynning barst um að kviknað hefði í flugvél með tugi manns innanborðs í lendingu á Reykjavíkurflugvelli í dag. Allt fór þó vel að lokum því þetta var flugslysaæfing sem á sjötta hundrað manns tók þátt í. Undirbúningur undir æfinguna hefur staðið í nokkra mánuði. Slysið var sviðsett við austurenda flugvallarins og æfð voru viðbrögð við því að vél með 90 manns innanborðs hlekktist á. Bílhræ voru notuð í stað flugvélar og sjálboðaliðar voru í hlutverki farþeganna. Gert var ráð fyrir að um 40 þeirra væru lífshættulega slasaðir. Þar sem ekki var unnt að sinna þeim öllum á Landspítalanum þurfti meðal annars að flytja þá á sjúkrastofnanir á Akureyri og á Akranesi. Menn frá björgunarsveitum, lögregluembættum, Flugmálastjórn, flugrekendum, heilbrigðisstofnunum, slökkviliðum, Rannsóknarnefnd flugslysa, og Rauða krossinum, ásamt sóknarprestum, tóku þátt svo einhverjir séu nefndir. Ekki var síður annasamt í Samhæfingarstöð Almannavarna þaðan sem aðgerðum var stjórnað. Þar fór öll skipulagning fram, menn voru ræstir út og séð um að þeirra þörfum yrði sinnt. Með yfirstjórn fór Karl Steinar Valsson, yfirlögregluþjónn í Reykjavík, sem segir æfingu af þessu tagi afar nauðsynlega. Hún eigi eftir að skila skarpari stjórnun, viðbrögðum og þekkingu á annmörkum teymisins. Og strax á fyrstu klukkustund komu annmarkarnir í ljós. Greiðlega gekk að slökkva eldinn og komast að slösuðum en aðgerðarstjórinn var ekki ánægður með hversu langan tíma tók að loka vettvangi slyssins af. Hann segir að það hefði verið mjög slæmt ef um alvöru slys hefði verið að ræða.