Verður FH Íslandsmeistari?

FH gæti fagnað sínum fyrsta Íslandsmeistaratitli í knattspyrnu karla í dag en þá fer fram 17. og næstsíðasta umferðin í Landsbankadeild karla í knattspyrnu. FH er með þriggja stiga forskot á ÍBV sem mætir Fylki í Eyjum. Vinni FH Fram og ÍBV tapar stigum gegn Fylki er titillinn FH-inga. Reyndar eiga Fylkismenn enn veika von um að hampa titlinum eftirsótta en þá þarf liðið að leggja ÍBV að velli og FH að tapa eða gera jafntefli gegn Fram. Síðan þyrfti allt að ganga upp hjá Árbæjarliðinu í lokaumferðinni. Á þessu má sjá að staða FH er afar vænleg og miðað við spilamennsku liðsins undanfarin misseri eru talsverðar líkur á að titillinn verði þeirra. Fyrir fimmtán árum síðan var FH-liðið í mjög svipaðri stöðu. Það gat tryggt sér titillinn á heimavelli í lokaumferð Íslandsmótsins árið 1989 með sigri á Fylki sem var þá svo gott sem fallið. FH tapaði hins vegar þeim leik, 1-2, og á sama tíma vann KA sigur á Keflavík á útivelli, 0-2, og stal hreinlega titlinum af FH á síðustu stundu. Það verður nú að segjast eins og er að lið FH í dag er mun sterkara en liðið 1989 og árangur FH í ár er ekki á neinn hátt tilviljunarkenndur eða markaður heppni. Þeir hafa leikið bestu knattspyrnuna og eru með breiðasta hópinn en nú mun þetta allt snúast um taugarnar. Þær brugðust fyrir fimmtán árum og spurningin er hvort þær halda nú. Ólafur Jóhannesson er þjálfari FH og hann var einnig við stjórnvölinn árið 1989, kom reyndar víða við í millitíðinni. Hann vill því væntanlega ná loksins að kveða niður drauginn sem fylgt hefur knattspyrnuliði FH öll þessi ár. Á hinn bóginn eru andstæðingar FH-inga, Framarar, oftast sterkastir á þessum tíma árs. Ár eftir ár hefur liðið bjargað sér frá falli í 1. deild á lokasprettinum og það sama virðist ætla að vera uppi á teningnum nú. Eftir hræðilega byrjun og þjálfaraskipti hefur leið liðsins legið upp á við og þeir munu án alls vafa leggja allt í leikinn gegn FH. Baráttan á botninum er einnig grjóthörð og Víkingur og KA gætu fallið í dag. Ef Víkingar tapa gegn Skagamönnum og KA fyrir KR, Fram vinnur FH, og Grindvíkingar næla sér í stig gegn Keflvíkingum, munu Víkingur og KA falla í 1. deild. Það getur margt gerst í þessari næstsíðustu umferð, úrslit geta ráðist á toppi og botni - en á hinn bóginn er möguleiki á því að spennan aukist ennfrekar og að allt ráðist í lokaumferðinni.