Flugkappar á flugsýningu

Þrír af elstu flugmönnum Íslendinga upplifðu það í Englandi um helgina að fljúga með sams konar vél og þeir flugu á fyrstu starfsárum sínum fyrir sextíu árum. Í tilefni af því að sextíu ár eru liðin frá stofnun Loftleiða skipulögðu Flugmálafélag Íslands og Fyrsta flugs félagið í samvinnu við Iceland Express hópferð til Englands um helgina. Sérstakir heiðursgestir voru þau Kristjana Milla Thorsteinsson, ekkja Alfreðs Elíassonar, stofnanda Loftleiða, gömlu flugstjórarnir Smári Karlsson, Magnús Guðmundsson og Dagfinnur Stefánsson, og Arngrímur Jóhannsson, stofnandi Atlanta. Þar endurnýjuðu gömlu flugkapparnir kynni sín af sérkennilegri flugvél, De Havilland Rapide, en þær notaði Flugfélag Íslands á innanlandsleiðum á Íslandi á árunum 1944 til 1950. Þetta voru tveggja hreyfla tvíþekjur, klæddar með striga, og þóttu hægfara og gamaldags en komust þó á loft á stuttri flugbraut. Þær tóku átta farþega í sæti og þurftu aðeins einn flugmann. Flogið var meðal annars yfir háskólabæinn Cambridge áður en lent var aftur, frammi fyrir 30 þúsund áhorfendum á flugsýningu á flugvellinum í Duxford utan London en þar er jafnframt stærsta flugminjasafn Evrópu. Flugferðin gekk að óskum og allir komust heilir niður þótt farkosturinn væri hinn mesti forngripur. Arngrímur Jóhannsson kom hins vegar öllum á óvart þegar hann tilkynnti um kvöldið að hann væri búinn að festa kaup á einni slíkri vél. En það voru fleiri forngripir sem þarna flugu, svo sem Lancaster sprengiflugvél úr seinna stríði, en aðeins tvær slíkar eru nú til flughæfar í heiminum. Þarna mátti sjá Fljúgandi virki, eða Boeing B-17, gamli Íslandsvinurinn Nimrod minnti okkur á þorskastríðin en hápunkturinn var sýning Rauðu örvanna. Um 80 Íslendingar sáu þarna þessa frægustu listflugsveit heims sýna leikni sína í háloftunum af ótrúlegri nákvæmni.