Helgi sigraði óvænt á Blöndósi

Óvænt úrslit urðu í fjórðu og næstsíðustu umferð Íslandsmeistaramótsins í torfæruakstri sem ekin var á Blönduósi á laugardaginn. Þar kom, sá og sigraði ungur piltur, Helgi Gunnarsson að nafni, bifvélavirki frá Vík í Mýrdal. Helgi var að keppa í sinni sjöundu torfærukeppni en það var einmitt í Blönduósskeppninni í fyrra sem hann mætti fyrst til leiks með nýsmíðaðan torfærubíl. Vann þrotlaust í ár Sjö keppnum og ári síðar stóð hann efst á verðlaunapallinum eftir að hafa unnið þrotlaust í ár við að endurbæta torfærubílinn sem hann kallar Gæruna. Með þessum sigri sínum hefur Helgi stimplað sig, svo um munar, inn í torfæruna en í hógværð sinni þakkar hann aðstoðarmönnum sinum og öðrum sem hafa styrkt hann sigurinn. „Mikilvægast er að bíllinn sé í lagi,“ sagði Helgi eftir keppnina en þeir félagarnir hafa reyndar þurft að eltast við smá bilanir í bílnum í sumar, einkum í rafkerfinu. Svo var þó ekki á Blönduósi þar sem Gæran virkaði óaðfinnanlega og 350 cid Chevy-vélin skilaði skammlaust öllum sínum 600 hestöflum. „Mér fannst þetta vera reglulega skemmtileg keppni,“ sagði Helgi, sem vildi ekki gera upp á milli keppnisbrautanna. „Síðasta brautin var kannski skemmtilegust en þar tókst mér að tryggja sigurinn. Endabrekkan þar hefði þó ekki mátt vera lengri. Það var helvíti tæpt að ég næði alla leið uppî. Eftir þennan sigur sinn er Helgi annar í Íslandsmeistarakeppninni, 10 stigum á eftir Haraldi Péturssyni sem er í raun búinn að tryggja sér Íslandsmeistaratitilinn. Það er nánast formsatriði fyrir Harald að mæta í síðustu keppni ársins sem fram fer á Hellu 11. september. Gunnar Gunnarsson á Trúðnum sigraði í götubílaflokknum en það var þriðji sigur hanns á árinu. „Þetta hafðist í dag þrátt fyrir að ég klúðraði 2. brautinni”, sagði Gunnar, sem lenti reyndar einnig í vandræðum í 5. brautinni vegna þess að lofthreinsarinn á vélinni var orðinn pakkfullur af ryki og drullu. Átta stiga forusta Gunnars  Keppnissvæðið var mjög þurrt og jarðvegurinn fíngerður svo að oftar en ekki hurfu bílarnir í rykmökk þegar ökumennirnir reyndu við erfiðar brekkur og börð. „Ég er nánast búinn að ná Íslandsmeistaratitlinum,“ sagði Gunnar, sem hefur átta stiga forskot á Ragnar Róbertsson. „Það er nánast formsatriði fyrir okkur að mæta á Hellu en við gerum ekki svoleiðis. Við mætum til að sigra. Það er alveg á hreinu og ég tala nú ekki um á Hellu,” sagðu Gunnar að lokum.   JAK