Ekki árás Valhallar

Oddviti sjálfstæðismanna í borgarstjórn segir misskilning liggja í þeirri túlkun Gunnars I. Birgissonar, flokksfélaga síns í Kópavogi, að höfnun borgarráðs á vatnslögn Kópavogsbæjar um land Reykjavíkurborgar sé árás Valhallar á Sjálfstæðismenn í Kópavogi. Bæjarverkfræðingur í Kópavogi undrast ummæli oddvitans um að hægt sé að fara aðra leið með lögnina. Samhljóða synjaði borgarráð Kópavogsbæ um framkvæmdaleyfi við vatnslögn í Heiðmörk þar sem það telur landið vera í eigu Reykvíkinga. Borgarráð tók undir álit borgarlögmanns um að leyfa ekki vatnslögnina fyrr en að leyst hafi verið úr deilum um eignarhald á svæðinu, svokölluðum Vatnsendakrikum. Í Fréttablaðinu í morgun er haft eftir Gunnari I. Birgissyni, formanni bæjarráðs Kópavogs, að hann trúi öllu upp á R-istann en eigi erfitt með að trúa þessu upp á sjálfstæðismenn í borginni. Gunnar segir það koma sér á óvart að Vilhjálmur Þ. Vilhjálmsson, oddviti sjálfstæðismanna í Reykjavík, skuli greiða atkvæði gegn vatnslögninni. Vilhjálmur svarar því til að í fyrsta lagi hafi hann aldrei verið aðsoðarframkvæmdastjóri flokksins, eins og segir í Fréttablaðinu, og í öðru lagi komi þetta mál Valhöll ekkert við. Hér sé um ágreiningsefni milli tveggja sveitarfélaga að ræða og að afstaða sín og og borgarráðs byggist eingöngu á faglegri umsögn borgarlögmanns en ekki einhverri geðþóttaákvörðun.  Vilhjálmur tekur hins vegar undir þau ummæli Sigurðar Geirdals, bæjarstjóra í Kópavogi, í fréttum Stöðvar 2 í gærkvöldi að það sé verið að færa samskipti bæjarfélaganna langt aftur í tímann og vonar hann að R-listinn nái sátt við Kópavogsbæ um málið. Vilhjálmur bendir á að Kópavogsbær geti farið aðra leið með lögnina sem yrði hugsanleg lausn í málinu. Þórarinn Hjaltason, bæjarverkfræðingur í Kópavogi, undrast þessi ummæli þar sem að leið sem liggi um land Garðabæjar sé lengri og því dýrari. Hann segir embættismenn Kópavogs og Reykjavíkur hafa rætt málið í marga mánuði og þetta sé í fyrsta sinn sem ábending hafi komið um að fara lengri leiðina. Þórarinn bendir á að í umsögn Reykjavíkurborgar til Skipulagsstofnunar á sínum tíma, þegar kannað var hvort framkvæmdin þyrfti að fara í umhverfismat, hafi ekki verið gerð nein athugasemd við staðsetningu vatnslagnarinnar, enda eigi hún að liggja að mestu leyti við hliðina á núverandi vegarslóðum. Bæjarverkfræðingur og lögfræðingur framkvæmda- og tæknisviðs Kópavogs mættu á fund bæjarráðs nú klukkan tólf til að fara yfir stöðu mála. Hægt er að hlusta á brot úr viðtali við Vilhjálm Þ. Vilhjálmsson úr hádegisfréttum Bylgjunnar með því að smella á hlekkinn hér að neðan.