Fá svar um skólavist í ágúst

Fjölmargt ungt fólk sem ekki hefur fengið svar frá framhaldsskólum landsins um skólavist þarf að bíða svars fram í ágúst. Framhaldsskólar eru að fara í sumarfrí og ná margir þeirra ekki að ganga frá málunum fyrir þann tíma. Þorgerður Katrín Gunnarsdóttir menntamálaráðherra sagði í Fréttablaðinu á föstudag að öllum nýnemum yrði tryggð skólavist. Þeir nemendur sem sótt hafa um og ekki fengið svör frá Fjölbrautaskólunum í Breiðholti og Garðabæ sem og Menntaskólanum í Reykjavík þurfa að bíða haustsins. Samkvæmt upplýsingum frá skrifstofu Borgarholtsskóla er skólinn yfirbókaður og hefur öllum sem komast þar að verið tilkynnt um það. Eins hefur Kvennaskólinn gengið frá umsóknum sínum. Margir framhaldskólar eru þegar farnir í sumarfrí og fengust ekki svör frá þeim. Á Akureyri er ástandið svipað því á höfuðborgarsvæðinu. Hjalti Jón Sveinsson, skólameistari Verkmenntaskólans á Akureyri, segir að 1.280 umsóknir hafi borist. Vísa þurfti rúmlega 100 umsækjendum frá. Í Menntaskólanum á Akureyri hefur 210 umsækjendum af 229 verið boðin skólavist. Jón F. Hjartarson, skólameistari Fjölbrautaskóla Norðurlands vestra á Sauðárkróki segir enn pláss fyrir 50 nemendur. Fimmtán þeirra kæmust að á heimavist skólans.