Hjarta hlýtur greftrun

Hjarta Loðvíks sautjánda, síðasta krónprins Frakklands, hlaut kirkjulega greftrun við hátíðlega athöfn í París í dag. Loðvík sautjándi lést 10 ára gamall, en foreldrar hans voru hálshöggvnir í frönsku byltingunni. Örlög Loðvíks 17. hafa verið mönnum deiluefni í tvær aldir. Ýmsar tilgátur voru á lofti, svo sem að hann hefði komist undan til Bandaríkjanna eða Þýskalands, en það ekki fyrr en með DNA tækni sem úrskurðað var að hjarta úr 10 ára dreng, sem lést í fangelsi árið 1795, væri sannanlega hjarta krónprinsins. Foreldrar hins ólánsama drengs voru konungshjónin Loðvík 16. og María Antoinette, sem fullvíst er talið að hafi verið líflátin í frönsku byltingunni. Sonur þeirra var hnepptur í Temple fangelsið, og mun hafa látist þar úr berklum við hrikalegar aðstæður 10 ára gamall. Raunar hafa einnig staðið deilur um hvort drengurinn hafi látist af veikindum eða verið myrtur í fangelsinu, en úr því verður varla skorið. Hjarta hans var varðveitt á safni í París, en sögusagnir um að drengurinn hefði lifað vistina af urðu engu að síður háværar. Hjartað verður nú grafið við hlið foreldranna. Um tvö þúsund manns vottuðu Loðvíki 17. virðingu sína við útförina í dag, þeirra á meðal var fjöldi konungssinna, sem kallaði hástöfum Lengi lifi konungurinn! Fulltrúar franska lýðveldisins voru hinsvegar fjarverandi.